وتد الطريق رقم 1 ضغوط مارس 2013


انا بقالي يومين بعمل حاجات غريبة :-
مثلا ببعت لنفسي Call Me Back  ولما تجيلي الرسالة
أقراها والاقيها بتقول كلمني
اقولها والله م انا معبرك
لحد هنا عادي
الاغرب بقي اني ساعات لما اسمع الكلام
واكلمني الاقيني مشغول وبزعل انه انا مش بيرد علي
*********
حاجة تانية بقي
انا سحبت صورة البطاقة والكارنية علي الاسكنر
وبقالي يومين بدور علي اوجه التشابة بيني وبين نفسي
في صورة البطاقة وصورة الكارنية ومش عارف اطلع شبه واحد حتي
واقعد اضحك وابص في عيني واضحك ..ههههههه
*********
واللي مضايقني فعلا اني بنام تقريبا 4 ساعات في اليوم
والارخم اني بصحي قلقان منهم كمان
وكوابيس ... ليه يعني كوابيس
م تولع الضريبة المؤجلة وينحرق مجمل الربح
وبعدين
انا اصلا كينج المسافات الطويل في النوم
يعني 8ساعات نوم وانت طالع ومن غير تقليبه واحده حتي
ازاي بقي يبقي دا حالي
انا حاسس بخطر
ربنا يتمها لغاية 1 مايو علي خير
يارب يعدي علي خير
او علي صحة علي الاقل مش مهمة الخير خالص
اصلا كده كده مش بيجي خير
في مكاتب المراجعة في مصر
******
عاوز اقرا السيرة الذاتية لستيف جوبز
بدات فيها فعلا بس مش لاقي وقت استمتع بالقراية
مفيش وقت اتنفس
زمان في الثانوية العامة
كنت بحب الادب قوي
وابوي دخلني علمي
كنت افتح كتاب الفيزياء
واحط فوقيه قصص لتشارلز ديكنز ، هـ جـ وليز ، الكسندر دوماس
واقعد اقرا وقال ايه الواد بيذاكر
دلوقتي اتمني احط سيرة ستيف جوبز علي ملف العميل واقعد اقرا
بس للاسف مش هينفع لاني قريت او م قريتش
خدعت او تظاهرت
كل اللي بعمله انه بضيق الوقت علي نفسي وبصعب الموضوع
الوقت الصبح بيجري
تقعد علي مكتبك الساعة 6 الصبح تكتب ملحوظتين تلاقي الساعة الضهر بيدن
بالليل العكس تقعد ساعة عشان الخمس دقايق تعدي
انا توصلت لانه المخ في الطبيعي بتاعه اداؤه بيكون اعلي وتركيزة كمان
لكن بعد كسر حاجز 12 ساعة شغل الاداء غصب عنك لازم يقلب تخلف عقلي
امبارح بقالي ساعتين بحسب ضريبة مؤجلة ومش عارف
مع اني عاملها ميت مرة قبل كده
*****************
انا اصلا حاسس من زمان انه اليومين دول صعبين موسم بقي
انا بعلب رياضة جميلة جدا
اسمها جري التحمل = عدو المسافات الطويلة
اتعلمتها من قصة جميلة قوي هحكيها بعدين
بس اتعلمت منها
انه لو قررت مثلا تجري 20 كيلو
وفعلا تقدر تحقق الهدف دا بكفاءتك وتدريبك السابق
الا انك في اول 700 متر تقريبا بتلاقي نفسك مش هتقدر تكمل
وعاوز تبطل وتوقف
انا حصلت معايا في البدايات
وبختبر الشعور دا مع اي حد طالع يتدرب معايا
لكن بعد اكتر من 5  سنين بلعبها
انا بقيت متمكن من معالجة هذا الشعور
حله الوحيد علي فكرة مش انك تصمم علي هدفك
لانه صعب جدا انت تقريبا لسه في اول كيلو
وجنبك شد عليك
رجلك بتوجعك قوي    نفسك اتقطع
دراعاتك اتخدلت
اه والله جري التحمل بيوجع الدراع برضه
الحل بقي مش التصميم علي الهدف
الحل تجزئة الهدف
لانه لو قلت لازم اكمل العشريتن كيلو بتلاقي نفسك بتحبط
لانه تخيل نفسك اضعف منك ... عقلك هو الاقوي
زي الست والراجل
الست لو حبت تدي انما الراجل لو فكر يدي اكتر
ودايما الفكر لازم يضحك علي القلب
عشان كده عقلك لازم يضحك علي نفسك ويقولها
شوفي يا جميلة اول هدف ليكي هو ال 500 متر اللي قدامنتا دول
شايفه اليافطة اللي هناك دي لو وصلتيلها هيبقي انتي كده جون
كده تسهل اكتر لانك علي نهاية العشرين كيلو
بتحقق اكتر من 40 هدف فرعي
ودا بيمثل حافز ليك علي الاداء والاستمرار
***********
بفضل من الله انا برنس في الصمود في التمرين دا
ارقامي قياسية علي حد مش متفرغ للرياضة
اتعلبمت منها الاسقاط علي حياتي العادية
لكن مخبيش عليكم
انا حاسس انه دراعي بيوجعني دلوقتي
ومعنديش مانع  اقول دا دلوقتي
لاني مش عارف ايه اللي هيحصل الايام الجاية
بس دي مش اول مرة احارب
انا قريت كتاب فن الحرب لسون تزو اكتر من مرة
وعارف انفسي كويس
اشتكي زي م انا عاوز
اضعف وحس انك خلاص هتقف
هتقع
هيغم عليك
حس باي احساس
لكن عارف انه عدي وقت وارجع هتلاقيني حققت ال40 هدف
معرفش ازاي
بس هو انا كده
وعشان كده هقول كده دلوقتي
واسيب الوقت يعدي
واقرا اللي كتبته واتعلم
واعرف ازاي كنت بفنن
في التعامل مع الضغوط
والصمود في اداء مظبوط
*******
أنا كتبتها كوتد في الصحراء اللي ماشي فيها دي
عشان لو وصلت ابص ورايا الاقي مفخرة اوتاد
تبين بالظبط انا كنت ماشي اازاي
وتسهل علي الصحاري الجاية
************
كتبتها بتاريخ 11 مارس 2013
متاثرا بضغط العمل خلال موسم الاقفالات المالية 2012
الضغط الذي تسبب في اقل اثاره ضرارا
في تخفيض ساعات النوم الي 4 ساعات فقط
*************
لا إلاه إلا الله .. سيدي محمد رسول الله
سبحان الله وبحمده سبحان الله العظيم

هناك تعليقان (2):

  1. الضغط النفسي في طريق الحياه لو متواجهش بتفكير ايجابي زي طريقتك دي يبقي عمرنا ما حنعمل حاجه وحنهرب وخلاص

    ردحذف
  2. مش فاهم يعني انا كده كويس ولا ايه

    ردحذف

تحياتي / محمود حموده :- سيتم مراجعة هذا التعليق قبل نشره خلال الـ 24 ساعة القادمة