مخاطر عملية المراجعة| إدارة المخاطر | Audit Risk

العلاقة بين بين مسدسي الـــ ريتاي بارون ومخاطر عملية المراجعة

لو مش بمهارة قراءة م بين السطور
الخلاصة بدون قشور في أول تعليق
.-.-.-.-.-.-.-.-.-.-.-.

مرة كنت رايح أنا والحاجة ماما مشوار وكان معايا مسدسي

المهم سبحان الله ومرة واحدة ومتفهمش ليه وازاي وامتي وكيف

لقيت كمين شرطة علي ناصية الشارع اللي رايحينه
وقتها مكنتش لابس جاكت ، ومكنش ينفع أخبي الريتاي

ومتأثرا بفيلم "عبود ع الحدود" ولكون أمي أعظم عظمات الستات

قلت للحاجة : " ماما خدي خلي المسدس دا معاكي عشان ميقعش مني "

المهم عدينا الحاجز وأفراد الشرطة

طبعا مش هقول للحاجة هاتي الحاجة علي طول
بس عيني لمحة كده وهي ماشية جمبي

لقيت الحاجة ماسكة المسدس في ايديها

أنا صعقت بس حسبتها لسه مطلعاه من شنطتها

قلتلها : " هو انتي طلعتي المسدس من الشنطة ليه ؟"

وببراءة الأطفال في عينيها قالت لي :-

"أنا سيبت في ايدي عشان لما تعوزه اديهولك علي طول "

وهنا الحقيقة في اللحظة دي مبقتش عارف سبب محدد لرغبتي في البكاء

هل هو #حنان_الأم ... الحاجة مستحملتش علي أطلب وتتأخر في إجابة طلبي

( طب م أنا بقالي 4  بقولك شوفي لي عروسة ومنفضالي اشمعن دي )

أم هل هو ما قد كان سيحدث لي عندما يستمع الضابط لاجابتها هذه

وبغض النظر عن مشاعري ساعتها

خلينا نتفق أنه #إدارة_مخاطر_العملية كانت منطقية علي النحو التالي
.-.-.-.-.-.-.
المسدس فيه #خطر_كامن

وجوده في حد ذاته كده مرتبط بخطر

واحد داخل علي كمين ومعاه مسدس !!!

كأنك داخل علي إقفال ومعاك إيرادات

مثلا شركة واخدة قروض مرتبط بحجم أعمال معين

مهو طبيعي هيبقي فيه خطر كامن في الإيرادات

الشركة اساسي لو الايرادات قلت هتعجل بالاعتراف بيها

عشان تستوفي المتطلبات

معيار الغش 240 المصري قالك

اعتبر الايرادات فيها مخاطر اشتغل علي الاساس دا

ولو اشتغلت علي انه مفهاش قولت كده علي اي اساس ؟

إنما المعيار الدولي قالك بسم الله كده خطط علي انه الايرادات خطر

.-.-.-.-.-.-.

حفظ المسدس #خطر_رقابة

طبعا بصفتي محاسب قانوني فلازم طبعا اقرأ بيئة حياتي

وأعمل إجراءات تكتشف أي انحرافات عن المسار العام

فطبعا لأنه في قانون أسلحة وذخائر في مصر

فكان طبيعي انه اجراءاتي للرقابة تكتشف الخطر وتتعامل معاه

يعني مستندات حيازتي للمسدس ليست مخالفة للقانون

بس هدخل في حوارت عقيمة جدا وفقا للبيئة

اللي هو مثلا حتي لو الايرادات تمام ومفهاش خطر كامن

بس مهو ممكن تتكتب فاتورة غلط أو تطلع من غير اعتماد

او يتصرف من المخزن صنف من غير يستوفي اجراءات

يبقي هنا بقي نعمل رقابة تحمينا وتضمن تحقيق الأهداف

.-.-.-.-.-.-.

المسدس مع الحاجة #خطر_عدم_إكتشاف

بصراحة عشان بتغاظ من الستات اللي بتعدي في المترو

من غير م تحط شنطتها علي جهاز الكشف

قلت طبعا وانا هفضل اتغاظ كده

طيب م انا استغل الحتة دي .. أنا كمان

خدي يا حاجة المسدس خليه معاكي

الستات وقت الجدل نصف المجتمع ومساواة

ووقت الجد .. ولو هنشيل اوبح .. يبقي فين الشهامة وتشيل اوبح لوحدك

بالظبط زي المراجع القفا اللي متصور انه عينة المراجعة

تبقي أكبر 100 عميل وأكبر 100 مورد وأكبر ....

طيب مهو أنا كده هظبطلك الحاجات دي
وألعب براحتي في غيرهم

لاني واثق انك مش هتكتشف غير اللي بتبحث عنه

.-.-.-.-.-.-.

الثلاث أخطار دول

نضربهم في بعض يطلعولي خطر العملية كلها

ولأني إتزنقت اني لازم اتعامل مع الخطر
اتعاملت معاه في كل نوع بالطريقة اللي تناسبة

تجنب الخطر  - تقليله - نقله إلى جهة أخرى

طبعا دا بعد م حددت الإخطار في الأولي وقيمتها

أكيد يعني مكنتش هسلم أمي عشان مش بتشوف لي عروسة

راجع أول تعليق لشرح كيفية تقييم الخطر في المراجعة

.-.-.-.-.-.-

عملية المراجعة الهدف منها ابداء الرأي علي القوائم

وحيث ان المراجع عليه قيود تتعلق بالأدلة التي يحصل عليها ومدي مصداقيتها وحسمها

وحتي القوائم المالية ذاتها تطولها مخاطر تتنوع بين شقين

شق يتعلق بمخاطر الحسابات نفسها واحتمالية تعرضها الحساب لخطر تحريف

وشق يتعلق بعجز اجراءت الرقابة في الشركة عن التعامل مع الخطر

وبذلك نجد 3 انواع مخاطر :-

المراجع : نصيبة خطر عدم الإكتشاف

الشركة : نصيبها خطر متأصل أو كامن + خطر الرقابة

وحيث أن نواة الجودة في عملية المراجعة هو التخطيط

وحيث أن محفز التخوف في المراجعة هي مخاطرها

لذلك فإن التخطيط لإدارة المخاطر يتم بالتسلس التالي

1- تحديد المخاطر ( كل حدث قد يؤدي إلي مشكلة)

2- التعرف عليها  ( الطبيعة والخصائص والتصنيف)

3- تقييم المخاطر ( نتائج هذه المخاطر )

4- إدارة المخاطر ( التجنب – النقل – التقليص – القبول )

وليست وسائل الإدارة اختيارية

وانما يتم تحديدها كمصفوفة توازن خطر المراجعة المقبول في العملية

بمعني

عندما يتم تحديد خطر مراجعة مقبول في عملية مراجعة قوائم شركة طلعت مصطفي مثلا

بمستوي 5 % وهو ما يعني ان مستوي الثقة المطلوب هو 95 %

اذا مطلوب ان يكون مكون معادلة الخطر ناتجه = 5 %

بمعني حاصل ضرب

(خطر الرقابة × الخطر المتأصل ) × خطر عدم الإكتشاف = 5 %

وبتطبيق مفهوم إدارة الخطر السابق عرض

يتم تحديد والتعرف وتقييم كل خطر

وحيث يمكن للمراجع التحكم فقط في خطر عدم الاكتشاف

فانه يتحتم عليه زيادة إجراءت المراجعة لتخفيض هذا الخطر

في حالة تضخم الأخطار المتعلقة بالعميل