جودة المراجعة | الكفاية والملاءمة | أدلة المراجعة | Audit evidence

من #مفاهيم_جودة_المراجعة

مقاييس الكفاية والملاءمة لأدلة المراجعة

*.*.*.*.*.*.*.*.*.*.*

هو الحقيقة كان يستاهل قوي

كل مرة رخامة غلست بيها عليها

عشان كده

لما كان موجود مرة وانا بفضي شنطتي

وإستغرب قوي البوصلة والميزان

مرضتش اريحه ....وقلتله :-

#) هو انت تعرف عني اني بشيل حاجه ملهاش لزمه يا ريس ؟!

*) قالي ايه اللي ممكن تحتاج بوصلة وميزان الكتروني فيه

#) قلتله طب  م انت كنت بتستغرب البنسة المعدن برضة

لغاية اليوم اللي اللي كوتش عربيتك ضرب واحنا ع الطريق

ومكنش معاك اي حاجه نفك بيها غطا الفردة

*) افهم ايه فايدة البوصلة والميزان في شنطتك

#) شوف يا ريس جودة المراجعة

تطلبت في شأن الحصول علي أدلة المراجعة

تميزها بصفتين الملاءمة والكفاية

عارف انت الحتة دي ...

تقريبا كل فقرة جه فيها ذكر

 لأدلة جه وراها لفظين كافية وملائمة

وحضرتك سيد العارفين انه الادلة اساس تكوين الرأي

*) يا بني جاوب علي أم السؤال شايل ليه بوصلة وميزان ؟

#) لا حول ولاقوة الا بالله مش الميزان فيه حرف الميم

يبقي يا خد مفهوم الكفاية اللي مفهاش ميم

والبوصلة دا مقياس الملاءمة

عشان تعرف بس يا ريس اني بجتهد قوي في تقفيل ملفاتي

*) انت اتجننت خلاص يا محمود

#) يعني انا عشان بتستخدم البوصلة في توجيهي للأدلة الملائمة لموضوع التأكيد

وبستخدم الميزان كمقياس لكمية الأدلة اللي هجيبهالك عشان تستلم مني ملف وزنه سليم وعضمته حلوه ابقي اتجننت .... شكرا للتقدير
.-.-.-.-.-.-.

اللي زعلني بجد بقي مش انه فضل يبصلي كتير وانا مبضحكش

وسكت للحظة فيها استلام لفكرة اني اتجننت فعلا  وصدق

بس اللي زعلني بجد اني بعد م سيبته طول الطريق للشركة

هيتجنن من اني بتكلم جد ولا بهزر وجيت قلتله الحقيقة

اني جايب البوصلة لتحديد القبلة وبحب أدرب عليها في الطرق

والميزان عشان البياعين بيتشغلوني وبيطففوا الميزان في مشترياتي

فبحب أوزن اللي اشتريته عشان أعرف مين البياع اللي بينصب علي

يقوم الافندي يقولي طيب وبتستفيد ايه لما تعرف انه مين اللي بينصب عليك

معرفتش اقوله مبشتريش منه تاني يا عبقري

.-.-.-.-.-.-.-

المهم انت سيبك من الهرتلة دي

ومع انها حصلت فعلا

الا انه الفعلا الأهم

انك تطبق فكرة الميزان للكفاية والبوصلة للملاءمة

في استقصاءك لأدلة مراجعة بما يوفر أساس مناسب لابداء الرأي

مثلا يعني حالة تهديد استمرارية

لو هتاخد فواتير مبيعات الفترة الحالية يبقي بوصلتك متشقلبة

-0-

لأنه الأكثر ملاءمة تدور علي خطة مستقبلية للإدارة تبين تعاملها مع تهديدات الاستمرارية مثلا لو كان التهددي نتيجة انخفاض مبيعات صنف حصله ركود

يبقي البوصلة المفروض تشير (لوالشركة تمام وعملت حسابها ) إلي إجراءات توضح قدرتها علي تسويق منتج جديد مربح مثلا أو إعادة الطلب علي المنتج الراكد كتعاقدات للبيع في الفترة اللاحقة مثلا .

بالنسبة للميزان بقي اللي هو مقياس الكمية هتلم شوية تعاقدات من اللي البوصلة شاورتلك عليها اللي يوزن معاك قصاد خطر تهديد الاستمرارية

يعني لو المنتج بيمثل 50 % من مبيعات الشركة وهيفقد بالكامل ودا هيوقع الشركة نهائيا ومش هتقوم غير لو غطت 40 % علي الاقل مثلا يعني ،  يبقي لازم توزن لي شوية ادلة من وش القفص بتاع البوصلة كده تكفي الــ 40 % دول
اقولك هات تعاقدات مستقبلية او دراسة جدوي بمؤشرات جيدة لانتاج منتج جديد يعوض خسارة الــ 40 % دي خلال فترة التهديد

وطبعا الكلام دا بشكل عامل مينفعش تطبقه بالنص

بس ينفع تاخد فكرته وتطبقها حسب الحالة اللي معاك

وابقي خد معاك بوصلة وميزان

ومتنساش طبعا تغلس علي مديرك

وهفرح قوي لو احتجت اي حاجه في حالة عملية وسالتني فيها في شأن البوصلة والميزان