الاسلام والجنسية اليابانية ومحمود حموده وقصر الاتحادية والمصريين والعمل وربنا

سبحان الله

اي صديق اخواني ميشير صورة لبلطجية ، او اي فيديو لشباب بيتخانق ومعاهم اسلحة مثلا  وكاتب تعليق بلطجية الفلول ولاد  الـــ(.............) عاوزين يفسدا البلاد ومش عاوزينها تنضف ومرة ولايمكن حميدين ياخدها دا اصلا واحد خمنا .ودي عصابة ومعاك يا مرسي و95 % مع مرسي ولولولولولوي يا ليبراليين يا كفرة يا اعداء الدين ، وهي لله هي لله مش للمنصب ولا للجاه

*************

واي صديق مش اخواني مشير صورة واحد بدقن من قندهار وصورة واحد عامل حادثة قطر ومتغرق دم وشوية دخان وحلقتين نار ، وكاتب تعليق يقولك ابو دقن الحقير دا اخوانجي اصلا وهو اللي ضرب الراجل الشهيد البطل اللي سايح في دمه ده وولع فيه وعملت بي بي  دخان عليه كمان ، ويسقط يسقط حكم المرشد ولا اخوان ولا مسلمين دول هما تجار الدين

-***************

محمود حموده بقي

ولا يهمه اي حاجه من القرف دا ليه ؟؟؟

لاني قررت اخد الجنسية اليابانية من زمان  وارمي الجنسية المصرية في (........مكان سئ للغاية لا يمكن ذكره  ....) من زمان اصلا . اه والله انا بقيت ياباني وافتخر  . وطبعا مسلم في الاساس وافتخر لو تسمعوا عن الدين دا ، ولو متسمعوش خالص احكي لكم عنه :-

انا الدين بتاعي بيقولي ايه بقي :-  

"وقل اعملوا فسيري الله عملكم ورسوله والمؤمنون"

وانا اصلا  مش معايا فلوس اعمل خير يناسب المكانة اللي عاوزها في الجنه ، وحتي معنديش وقت اتطوع بالخير  والعبادة

قلت اعمل ايه بقي وفقا لفهمي اللي علي قدي للدين بتاعي اللي هو الاسلام – لو تسمعوا عنه -

مش ربنا هيشوف عملي

مظبوط

وربنا بيحاسب علي النوايا

تمام

طيب يا رب ليك علي احطك في قلبي وعقلي واتخيل اللحظة اللي هقابلك فيها وتسالي عملت ايه في عمرك في كل دقيقة بشتغلها في كل لحظة ومع كل فكرة في كل خطة قلم وفي كل قلبة ورقة ومع كل فاتورة وخلال كل قيد .

عشان لما اجي اتسال عن الاربع أجاوب عن عمري واقول :-

مش انا عمري 24 ساعة في اليوم

12 ساعة	في الشغل بالجنسية اليابانية يعني كل لحظة من 12 ساعة شغل مش رغي أو تزويغ ( وقل اعملوا فسير الله عملكم )
2ساعة	مواصلات ذهاب واياب للشغل وخلالهم بقرا الكتب اللي حملتها علي موبايلي (وقر ربي زدني علما)
2 ساعة	مع اهلي (صلة رحم )
2 ساعة	تصفح الميل ومساعدة زميل او صديق او اي حد معرفوش حتي والاطلاع  سريعا علي اي جديد اتكتب في الضرايب اوالمحاسبة (من خفف عن مسلم كربة من كرب الدنيا )
6 ساعات	نوم من ابو ضمير مرتاح (راحة للبدن )
24ساعة	الاجمالي بتقوي الله

في ناس بتحسسني اني المفروض اتكسف من اليوم بالشكل دا المفروض كده اني مش عايش شبابي يعني ، بس معتقدش اني هتكسف وانا واقف قدام ربنا وهو دا اللي يهمني انا عايش حياتي علي الاساس دا عندنا في الإسلام دا الاهم رضا ربنا .

الشغل مقدس  بالنسبة لي ،  الشغل دا طريقتي في التميز في العبادة ،  ليه لاني بتقن شغل وبجتهد قوي فيه

وبستمتع بصوت طرقعة ضهري لما افردة علي السرير من تعب طول النهار ، الاخلاق دي اخلاق ديني

************************************

*******************************************************

والله بقي لقيت الاخوان المسلمين اخلاقهم زي يبقي انا وهم اخوة

لقيت الفلول والليبراليين اخلاقهم زي يبقي انا وهم حابيب

انما لغاية دلوقتي انا مش لاقي غير اليابانيين بيقدسوا

العمل اكتر من اي شئ تافه تاني في الدنيا

محدش يعرف جنس ملة اليابانيين

ًَكتبت بتاريخ 5 /12 /2012 تعقيبي علي مهزلة المواجهات امام قصر الاتحادية بين مؤيدي (...) ومعارضية 

لم اذكر موضوع او شخص التاييد والمعارضة لان التاريخ لا يجب ان يذكر التفاهة 

وإن ذكر التاريخ شيئا عن 5 /12/ 2012 فسيذكر ان محمود حموده استطاع تجهيز برنامج محاسبي متكامل لشركة مساهمة متعددة الانشطة خلال اسبوع عمل واحد فقط وتمكن من اختبارة في اقسي العمليات ونجح في ذلك انتظروا عرض سريع للبرنامج وتفصيل لحرفيات تنفيذه علي دروس قناتي علي اليوتيوب والمدونة